O Blog de Editorial Galaxia

O crítico literario Ramón Nicolás escribe no último “Culturas” de La Voz de Galicia sobre a novela premiada co García Barros 2009, Un tipo listo, de Xosé Monteagudo.

Velaquí o podedes ler.

Este é o título para a crítica de Miguel Sande publicada no suplemento “Culturas” de La Voz de Galicia sobre o poemario Acusación, de Xiana Arias.

Vicente Araguas dedicou a súa crítica do último suplemento “Nordesías” do Diario de Ferrol ao epistolario Cando o futuro comezaba, que recolle a correspondencia entre Ramón Piñeiro e Xosé Luís Franco Grande de 1955 a 1990.

Velaquí podedes ler o artigo completo.

Así titula Xavier Castro Rodríguez a crítica sobre BRANCO, a última novela de Manuel Darriba, na colección Literaria de Galaxia.

Velaquí podedes ler o artigo, publicado o pasado sábado no Galicia Hoxe.

O libro de Benigno Campos e as novelas de Domingo Villar encabezan a lista dos máis vendidos

A cociña de Larpeiros, de Benigno Campos, foi o libro de Editorial Galaxia máis vendido ao longo do ano 2009: arredor de 34.000 exemplares entre agosto e decembro dese ano, certamente un éxito sen precedentes. A continuación séguenlle as novelas de Domingo Villar, tanto A praia dos afogados, que saíu nese ano 2009, coma Ollos de auga, publicada en 2006, que vai pola sétima reimpresión.

Editorial Galaxia presenta no seu apartado CIFRAS os resultados de produción editorial dese ano: 104 novidades, cun catálogo vivo de 1.258 títulos e unha tiraxe media de 1.700 unidades por título.

Entre os clásicos salienta A esmorga, de Eduardo Blanco Amor, que ocupa o lugar número 5 na lista dos máis vendidos. Precisamente o ano pasado cumpríronse 50 anos da primeira publicación desta novela, fundamental na historia da narrativa contemporánea galega. Aínda que segue sendo Castelao quen mantén ano tras ano os seus títulos entre os vinte máis solicitados: Os dous de sempre, Os vellos non deben de namorarse, Retrincos e Cousas.

Séchu Sende con Made en Galiza, Breogán Riveiro con Tonecho de Rebordechao, Manuel Núñez Singala con Comedia bífida, Francisco Castro con Chamádeme Simbad e Manuel Rivas con Que me queres, amor? son outros autores contemporáneos que recibiron acollida especial por parte dos lectores.

Entre as traducións sobresae Do que estou a falar cando falo de correr, a última entrega de Murakami, quen veu presentar persoalmente o libro a Compostela, e mais un clásico do noso catálogo: O principiño, de Saint-Exupèry, traducido en 1972 por Carlos Casares.

No ano 2009, Editorial Galaxia publicou 28 traducións, reafirmando unha liña de traballo que ten tamén unha importante resposta de lectores. Sobresae a colección Biblioteca Compostela, que xurdiu co apoio da Concellería de Cultura do Concello de Santiago e arredor do Premio de Novela Europea que promove o Casino desa cidade. Entre o ano 1990 e o ano 2009 saíron dos prelos de Editorial Galaxia 4.467.466 exemplares de libros en lingua galega.

Hoxe, ás 20.00 h, na librería Couceiro de Santiago

Xosé Neira Vilas presenta o seu último libro, ‘Cartas de vellos amigos’. Estará acompañado por Víctor F. Freixanes e Dolores Vilavedra. Trátase dun documento de excepción pola personalidade dos correspondentes e polo seu valor como testemuño dunha parte importante da historia da Galicia do século XX.

Nestas ‘Cartas de vellos amigos’, Xosé Neira Vilas mantén vivos os vencellos que o unen ao mundo cultural da Galicia do interior e ao da diáspora. Sen sucumbir a saudades paralizantes, convertendo a distancia nun pulo construtivo para o individuo e para a comunidade, concretada metonimicamente nesa rede de amigos que o epistolario está, carta a carta, a tecer.

Neira Vilas é sen dúbida un dos escritores máis sobranceiros do noso país. Nacido en Vila de Cruces en 1928, a súa vida e a súa obra está marcada pola emigración, que el viviu en primeira persoa en Arxentina e Cuba. Dese sentir nace Memorias dun neno labrego, un dos libros máis famosos das letras galegas. A mestría do Neira Vilas narrador amósase nese e noutros moitos libros que lle valeron o recoñecemento da sociedade galega.

Un longo camiño aínda por percorrer

Como cada oito de marzo, celebramos hoxe o Día Internacional da Muller Traballadora. E como cada oito de marzo, lembramos que o camiño aínda é moi longo, e que as mulleres e os homes debemos facelo xuntos.
Teremos que loitar por chegarmos a unha realidade na que a igualdade non sexa un obxectivo, senón unha realidade. Para iso, é obvio que hai que animar ás autoridades educativas e ao conxunto da cidadanía para que, dende a base, axuden a crear unha sociedade non discriminatoria onde independentemente do sexo cada un de nós teña as posibilidades reais de se desenvolver en plenitude.

Afortunadamente, no sistema literario galego hai ben de tempo que as autoras comezaron a ocupar o territorio que lles corresponde, en pé de igualdade cos escritores galegos. Así, por só botar un ollo ao catálogo máis recente da nosa editorial, atopamos que autoras como Alicia Borrás, Yolanda Castaño, Fina Casalderrey, Xiana Arias ou Begoña Caamaño, entre outras, publicaron libros recentemente. Outras voces femininas importantes chégannos a través da tradución, como é o caso de Sarah Waters. En definitiva, voces poderosas dende o feminino para engrandecer aínda máis a nosa cultura.

Hoxe, todas e todos somos feministas.

O ilustrador Xosé Tomás, que tantos traballos leva feitos xa na nosa editorial, será un dos artistas que protagonizarán co seu traballo a Feira de Bolonia que vai dar comezo en dúas semanas.

Mais hoxe é actualidade porque a prestixiosa publicación da China, DPI de Deseño e Ilustración, ofrece no seu último número unha reportaxe sobre o ilustrador de Betanzos. Entre outras imaxes (información completa no blog do autor), na revista que se edita en Taiwan adiántase algunha imaxe do libro de Araceli Gonda, Os amigos de Santi, que, ilustrado por Xosé Tomás, axiña ha saír do prelo na colección Tartaruga.

Abre hoxe ás 10 no Centro Comercial Dolce Vita

Esta exposición, con textos de Teresa Moure e ilustracións de Leandro Lamas, permanecerá aberta dende o 8 ata o 30 de marzo, de 10 a 22 h. Impulsada por FEDEGALMA, leva algo máis de un ano itinerando, con grande éxito, por toda Galicia, impulsando unha visión positiva da lactación materna.