Sidecar (post 20), por Alberto Lema
Autor: administrador | | Tags: alberto lema, sidecar | Categorías: Balcón de libros |
IN THE GHETTO
Tiña que ser un branco do Sur precisamente o que advertise ao mundo dos perigos dun rapaz negro criado na miseria, a canción podería valer tamén como resumo do ideal socialdemócrata: dálle unha pensión ou un día pegarache un tiro. Pero deixemos para Zizek as digresións políticas con base na cultura popular que as sabe facer mellor, e aproveitemos só o título daquel hit da idade da inocencia americana: o teólogo Andrés Torres Queiruga ingresa no ghetto. A liña de sombra da disidencia móvese con tal velocidade cara á dereita que mesmo un pensador honesto, brillante, conciliador e jaspersiano coma el pode ficar atrapado na escuridade a pouco que dubide un chisco de máis sobre a calidade da luz dogmática emitida desde a Conferencia Episcopal Española. Na súa lista de calificativos habería que engadir un máis: galeguista, e supoñemos que terá sido un agravante á hora de xulgar o seu caso desde Madrid. A nosa solidariedade, nesta hora difícil, co Profesor Torres Queiruga.
