Branco 15 (por Manuel Darriba)
Autor: administrador2 | | Tags: branco, manuel darriba | Categorías: Balcón de libros |
Máis tensión
O meu amigo escritor aguanta a respiración ao outro lado da liña telefónica.
_¿Dis que escribiches catro capítulos en dúas horas? _pregunta con dificultade_. Serán curtos, supoño.
_Pse. ¿Palabras ou caracteres?
O meu amigo bufa.
_Déixao. Estás nun erro. Non se pode escribir tan rápido. ¿Sabes o que súo eu para producir un folio ó día? Claro que eu son un escritor profesional. E un perfeccionista!
_Vale, vale… Eu non son un escritor profesional, pero non me conformo con calquera cousa, entendes?
O meu amigo garda silencio.
_E de que estás a escribir, se se pode saber? _pregunta, mastigando cada palabra.
_Da vida. A vida en xeral, con todas as súas… complicacións.
O meu amigo ri.
_Algo autobiográfico? Queres aburrir aos teus improbables lectores?
Non contesto. Esta charla estase a poñer tensa. Penso que vou colgar.
_Outra cousa _di rapidamente_. ¿Quen son os teus personaxes? ¿Que lles pasa?
_Nin puta idea _digo; e colgo.
