Contos para ler e escoitar
Autor: administrador | | Tags: branca de neve e os sete ananos, o galo quirico, os catro amigos, os sete cabuxos | Categorías: Novidades |
Nacen os ‘Audiocontos Galaxia’
Os sete cabuxos, Branca de neve e os sete ananos, O galo Quirico e Os catro amigos son os catro primeiros títulos escollidos pola nosa editorial para presentar a colección ‘Audiocontos’ que a vindeira semana chegará ás librerías de toda Galicia e que este domingo se presenta dentro do ‘Achegarte’ da Coruña, ás doce da mañá nunha sesión de animación á lectura a cargo dos actores de dobraxe e músicos Teresa Santamaría e Paco Barreiro.
Os audiocontos son unha fermosa proposta que conxuga a literatura de sempre cunhas versións dramatizadas, en CD, a cargo destas dúas coñecidas voces da dobraxe galega, baixo da dirección de Tero Rodríguez.
Estes primeiros audiocontos permitirán, sen dúbida, achegar as historias que coñecemos de toda a vida doutra maneira aos máis pequechos da casa. Non se tratan de simples narracións, senón dunha proposta artística diferente e ao mesmo tempo complementaria ao libro. Os efectos de son, as músicas escollidas e a interpretación, fan destes audiocontos un produto novidoso que ensaiamos agora en galego e do que estamos certos que terán unha boa acollida.
Ademais, os CDs ábrense e péchanse cunhas animadas cancións que serven de pórtico e epílogo perfecto a unha das cousas máis marabillosas que hai: que alguén nos conte un conto.
