As razóns do galego 7 (por Henrique Monteagudo)
Autor: administrador | | Tags: as razóns do galego, henrique monteagudo | Categorías: Balcón de libros |
Apoloxía da verdade
Cando o famoso affaire da entrevista en Vieiros, critiquei eu as posicións catastrofistas dos que alardean (si, alardean) de que o galego experimentou unha evolución calamitosa nas últimas décadas. E critiqueinas non por outra cousa que por careceren dun fundamento empírico nos datos máis fiables que temos ao noso dispor. O que me sorprendeu moito foi que o entrevistador reaccionase preguntándome se, caso de ter eu razón e eses datos non seren tan malos como os catastrofistas aseguran, non sería esta ‘unha verdade inconveniente’, que podería prexudicar a defensa do galego, e por tanto, sobreentendíase, fora mellor silenciar.
A isto ofrecinlle dúas respostas. Primeiro, na miña opinión é bo que a xente saiba que a evolución do galego non foi tan mala, pois entre outras cousas demostra que pode mellorar; dito doutro xeito, que a catástrofe non é inevitable, que podemos intervir para mudar o fado do idioma. Pola contra, insistir no pésimo que van as cousas pode ser entendido como un convite precisamente ao pesimismo, ao desánimo e, en definitiva, ao fatalismo e o abandono.
Segundo, dixen, eu son profesor, dou clases de sociolingüística; xa que logo, por elementais razóns de ética profesional teño que aterme á verdade, aínda que esta fose inconveniente. Pois ben, aínda que resulte difícil de acreditar, houbo algúns comentaristas (máis ben do sector energúmeno) que manifestaron ou a súa incomprensión ou directamente o seu desprezo, mesmo pitorreo, por este argumento. Quedei abraiado. Será posible que haxa xente que teña tan pouco respecto pola verdade? Haberá quen pense que se pode defender seriamente o galego enganando a cidadanía? Como dirían na miña terra, amodo ho! Ou, se o queredes en inglés, It’s hard to believe…
